Vebjørn Sture trur dei komande månadane blir eit målpolitisk maratonløp.
Namn: Vebjørn Sture
Alder: 24 år
Yrke: Faglært snikkar. Arbeider ut juni som organisasjonssekretær i Elevorganisasjonen. Tek over som leiar av Norsk Målungdom på fulltid i sommar.
Brukar sommaren til? Målsak! Frå tidleg juni til seine august – med NMU-sommarleiren som det soleklåre høgdepunktet. Når det er sagt, har eg også ordna meg med eit par små ferieveker i juli. Då går turen til fjells.
Kva er ditt forhold til språk? Ironisk nok er det meir omfattande enn eg sjølv har språk til å skildra. Men for å gjera eit forsøk: For meg er språket er eit verkty, ein identitet og eit verdival. For samfunnet rundt oss er språket eit rammevilkår for tenking. Difor er eg svært oppteken av kva verdiar språket er – og vert – bygt på.
Korleis er det å ta over leiarvervet i NMU? Det er stas, kort sagt! Å få ei slik oppgåva er ei sann ære, og eg gler meg stort til å ta fatt på arbeidet – særleg fordi eg får arbeida med ein heilt fabelaktig flott gjeng målungdomar. Eg sluttar aldri å la meg imponera av kor staute og gilde folk som finn vegen inn i organisasjonen vår, og det svært inspirerande å få kjempa for nynorsken i lag med dei.
Kva blir NMU si viktigaste oppgåve framover? I vinter skal læreplanen i norsk reviderast. Prosessen er i gang for lengst, og dei komande månadene vert dimed eit målpolitisk maratonløp. NMU si viktigaste oppgåve i denne perioden er å få gjennomslag for at norskfaget skal gjera alle elevar skriveføre i både bokmål og nynorsk. Det er ikkje tilfellet i dag, diverre, og det skapar mykje frustrasjon både for nynorsk- og bokmålselevar.
