Jens Brekke i Vik ønskjer å få eit førelegg frå politiet på nynorsk – ikkje bokmål. Det har han ikkje rett på, ifølgje Sivilombodsmannen.
Brekke fekk tidlegare i år eit førelegg på 7000 kroner for å ha tent eit bål utan løyve. Han betaler gjerne, men ikkje før førelegget kjem i nynorsk-versjon, fortel NRK.no.
Politiinspektør Bjørn Larsen ved Sogn og Fjordane politidistrikt har tidlegare uttalt at Brekke ikkje har rett på ei nynorsk-bot. Seksjonsleiar i Språkrådet, Kristin Solbjør, stadfestar det. Ho viser til ein tidlegare uttale frå Sivilombodsmannen i 1994.
– Sivilombodsmannen tolka mållova slik at førelegg ikkje er omfatta av lova, seier Solbjør til NRK.no. (©NPK)
