Ap-nestleiar Helga Pedersen signaliserer at årets landbruksoppgjer blir «moderat» trass beskjed frå dei landbrukspolitiske ekspertane i partiet om at temperaturen er høgare enn tidlegare.
Ap sette ned ei landbrukspolitisk ressursgruppe på Stortinget. Gruppa skal komme med innspel til partiet rundt jordbruksforhandlingane og til stortingsmeldinga om landbruk.
Pedersen slår fast overfor Nationen at gruppa skal bidra med råd, ikkje noko meir.
– Me har mange grupper i partiet som ønskjer meir pengar til sitt område, og denne gruppa kan ikkje diktere landbrukspolitikken til Ap, seier Pedersen.
Landbruksgruppa i Ap blir leia av Arne L. Haugen, fraksjonsleiar i næringskomiteen på Stortinget. Haugen meiner at temperaturen i landbrukspolitikken er betydlege høgare enn på mange år.
– Eg får veldig mange meldingar inn både frå bønder, Ap-ordførarar, regionalråd og fylkesting. Eg merkar at temperaturen er mykje større enn tidlegare, seier han til avisa.
Pedersen vil ikkje love noko løft i årets jordbruksoppgjer. Tvert om må bøndene vere med på å bere ansvaret for ein stram økonomisk politikk.
– Det er for tidleg å seie, men også jordbruksoppgjeret må vere prega av moderasjon. Heile samfunnet må ta ansvar for å halde talet på arbeidsledige lågt, seier Pedersen. (NPK)
