20 kommunar og Longyearbyen lokalstyre får delta i forsøket med røysterett for 16 – og 17 – åringar ved lokalvalet i 2011.
143 kommunar søkte kommunal – og regionaldepartementet om å få delta i prøveprosjektet der 16 – åringane skulle få røysterett ved lokalvalet i 2011. Målet med prosjektet er å auke det politiske engasjementet blant ungdommen.
Desse kommunane vart valde ut til å delta i prosjektet: Marker, Lørenskog, Hamar, Vågå, Sigdal, Re, Porsgrunn, Grimstad, Mandal, Gjesdal, Stavanger, Austevoll, Luster, Ålesund, Osen, Namdalseid, Tysfjord, Kåfjord, Hammerfest, Kautokeino og Longyearbyen lokalstyre.
– Heile 143 kommunar søkte om å få bli med på prosjektet. Interessa var overveldande. Skal me behalde eit levande lokaldemokrati også i framtida, må me ha ungdomen med oss. Eg vonar 16-åringar ved å kunna røysta ved lokalval, kjem fortare inn i ei rolle som aktive innbyggjarar i lokalsamfunna sine, seier kommunal- og regionalminister Magnhild Meltveit Kleppa i ei pressemelding.
I utvelginga er det lagt vekt på variasjon i storleik, geografi, sentralitet, politisk samansetning i kommunestyret og variasjon i alderssamansetninga.
– Saman med dette har me lagt vekt på korleis kommunen i søknaden seier at dei vil trekkja ungdom med i politisk arbeid. Til saman vert dette eit forsøk som omfattar ulike typar kommunar i heile landet, seier Kleppa.
