Arbeidarpartiet kjem ikkje til å støtte regjeringas opplegg for tvangssamanslåing av kommunar. Det er den utstrekte bruken av tvang som får Ap til å vende tommelen ned.
I kommunalminister Jan Tore Sanners forslag opnast det nemleg for at kommunesamanslåingar kan skje med tvang. Ap er svært lunkne til dette.
– Vi kan ikkje støtte regjeringas forslag slik det no ser ut. Regjeringa opnar for utstrakt bruk av tvang dersom ikkje kommunane konkluderer slik regjeringa vil. Det kan vi ikkje støtte, seier Aps nestleiar Helga Pedersen til Aftenposten.
Ho meiner at ei reform må vere basert på reell fri vilje og krev at Høyre og Frp må komme med ein justert kommunereform dersom dei ønskjer Aps støtte.
Aps haldning kan føre til at tidsplanen for kommunereforma sprekk. Målet var å kunne presentere eit heilt nytt kommunekart i 2017, men sentrale kjelder i Høyre seier til Aftenposten at det er problematisk å sette i gang ein slik omfattande reform utan å ha eit breitt fleirtal, inkludert Ap, bak seg i Stortinget.
Kommunalpolitikar i Høgre Frank Jenssen seier til avisa at han har problem med å sjå kva for delar av reforma Ap eigentleg er ueinig i. Han seier at han ikkje kjenner seg igjen i skildringa av at regjeringa legg opp til utstrakt tvangsbruk.
– Vi oppfattar at Ap også ser eit behov for ei kommunereform, og det er bra, seier Jenssen. Han ser ikkje bort frå at det kan vere aktuelt å sjå på enkeltpunkt på nytt. (©NPK)
