– Språkåret 2013 skal bli året som endrar framtida, sa Ottar Grepstad, direktør for Nynorsk kultursentrum, under Noregs Mållag sitt landsmøte som vart halde i Suldal sist helg.
Året skal bli ein dugnad for språk, held han fram, og la til at her skal alle språklege miljø få høve til å delta. Nynorsk kultursentrum har ansvaret for å utvikle Språkåret 2013, og nytta høvet til å oppfordre einskildpersonar og organisasjonar til å ta kontakt dersom dei ynskjer å bidra med idear.
Nynorsk kultursentrum har allereie ein del idear på blokka, og nemnde verdskonferanse om fleirspråklege samfunn, ein dag der heile verda bloggar om språk, folkebok om Ivar Aasen, språkdagar i skular og barnehagar, målpause i fotballkampar, språkvandring frå Vadsø til Aasen-tunet, den nynorske skulesekken eller ei vandreutstilling om lese- og skrivekunne som nokre av aktivitetane Språkåret kan kome til å innehalde.
– Me legg opp til systematisk bruk av nettstad og sosiale medium, fortel Grepstad.
Målet med Språkåret 2013 er mellom anna å skapa større språkleg sjølvkjensle og gjere alle stolte av at me har 2 norske språk.
– Språkåret skal aldri slutte, sa Grepstad. – Det skal berre gå over i andre former.
SPRÅKÅRET 2013:
Nynorsk kultursentrum skal på oppdrag frå Kulturdepartementet utarbeide planar for Språkåret 2013.
Jens Kihl (24) er tilsett som prosjektleiar for Språkåret 2013, og tek til i jobben 1. juni.
Språkåret 2013 skal femne om både nynorsk og bokmål, teiknspråk, urfolksspråk, minoritetsspråk og innvandrarspråk.
(Kjelde: Aasentunet.no)
