Noregs Mållag ber no Kristin Halvorsen rydde opp i registreringa av nynorskelevar.
Kunnskapsminister Kristin Halvorsen kjem på landsmøtet i Noregs Mållag fyrstkomande fredag. Noregs Mållag ber no ministeren rydde opp i det dei meiner er ein systemfeil i registreringa av nynorskelevane.
Halvorsen har tidlegare uroa seg for vilkåra nynorskeelevane har, ikkje minst sidan rapportar har vist at mange av dei forlèt nynorsken. No er det derimot kome fram informasjon frå Hordaland fylkeskommune om at registreringssystemet ved skulane fungerer slik at alle elevar automatisk blir registrerte som bokmålselevar, viss dei ikkje aktivt endrar dette sjølve.
Dagens system fører til dømes til at fylkeskommunen har registrert 10 % nynorskelevar frå Stord kommune medan Stord vidaregåande skule melder at 90 % av avgangselevane har nynorsk som hovudmål.
– At nynorskelevane blir registrerte med rett målform, er ei grunnleggjande forsikring om at dei blir behandla som nynorskbrukarar i skulen. Vi forventar at kunnskapsministeren ryddar opp og vonar ho vil avklara dette alt på vårt landsmøte på fredag. For kunnskapsministeren bør det vera viktigare å sikra rettane til nynorskelevane enn å gjera det lett for statistikarane, seier leiar i Noregs Mållag, Håvard B. Øvregård.
