Helga 8. – 10. mai opnar den tjuande sesongen for Den norske bokbyen i Fjærland. I år lanserer dei for første gong eit døgnope utsal med bøker på framandspråk.
– Vi opnar eit lite utsal vi kallar «Sjøkanten», seier dagleg leiar for Bokbyen Marianne Supphellen til NRK.
Ho fortel at bokbyen laga nokre bokhyller til innspelinga av den tyske serien «Liebe am fjord» som mellom anna blei spelt inn i Fjærland for nokre år sidan, og at dei no vil gjera stas på desse med å fylla hyllene med bøker på andre språk.
– Det blir ei «honesty»-hylle der ein kan kjøpa bøker heile døgnet, seier ho.
Som namnet tyder på er handelen basert på ærlegdom. I praksis betyr det at kundane kan velja seg ei bok og betala ved å putta pengar i ein postkasse. (©NPK)
