Annakvart år deler LNK ut ein «Pris for god offentleg målbruk. I 2011 fekk Sogndal Fotball prisen og takka med eit skikkeleg Sogndal-show under landstinget på Sand.
Prisen for 2013 blir delt ut av Kari Traa under LNK-landstinget på Voss i april. Dagleg leiar i LNK, Vidar Høviskeland, er spent på kven som får årets pris.
– Dette vågar eg ikkje å spå noko om. Pris for god offentleg målbruk er ein pris som femner vidt. Prisen har gått til alt frå kommunar til kokkar og musikarar. Dei første åra var nok ideen først og fremst å gi ei oppmuntring til offentlege etatar og institusjonar som gjorde ein særskild innsats for nynorsken. Etter kvart kan det sjå ut som om prisen meir og meir har gått frå «god offentleg målbruk» til «god målbruk i det offentlege rom». Altså alle profilerte nynorskbrukarar, seier Høviskeland og meiner det er langt frå Peer Gynt-spelet og Odd Nordstoga til Fylkesmannen i Rogaland og Vågå reiselivslag, sjølv om alle er tidlegare prisvinnarar.
No håpar han både medlemer og einskildpersonar kjem med forslag. Styret i LNK er jury og skal avgjera kven som får prisen på eit møte 8. mars. Prisen er på 50 000 kroner og eit grafisk trykk av Ludvig Eikaas: «Titt eg minnest», med motiv frå det gamle Aasen-tunet i Hovdebygda.
