Kulturmagasinet Q har sett nærare på talet på barn og unge som nyttar seg av norske kulturskular. Talet har ikkje vore lågare sidan 2001/2002.
I den nye utgåva av Kulturmagasinet Q, som kjem ut neste veke, blir ei måling offentleggjort som viser talet på elevar i kulturskulen dei siste åra. Trenden er sterkt nedadgåande.
Talet på elevar låg på godt over 109.000 frå 2009 – 2011, og nådde ein topp på 110.432 elevar i 2011/2012.
Men så snudde det. No er elevtalet 102.907.
Kulturmagasinet skriv på leiarplass at når nærare 8.000 elevar blir borte på tre år, då er det på tide å rope eit varsku.
– Med atterhald om målefeil er dette særdeles urovekkjande, seier forbundsleiar i Musikernes Fellesorganisasjon Hans Ole Rian i ein kommentar på nettsida til magasinet. Han legg til:
– Alle barn som ønskjer det får ikkje eit kulturskuletilbod, og prisen er absolutt ikkje rimeleg. Dette er openbert blant årsakene til at elevtalet minkar. (©NPK)
