Med både meir inntekter enn budsjettert og fleire gjester enn trudd er det det eit faktum at dei 20. nynorske festspela i Ørsta og Volda blei ein suksess.
Medan mange festivalar slit med økonomien, tyder dei førebelse tala for Dei nynorske festspela på det motsette. I år fekk festspela 23 prosent høgare billettinntekter og 14 prosent fleire gjester enn budsjettert.
Totalt møtte om lag 6.400 opp på dei 53 arrangementa, som gjekk føre frå torsdag til søndag førre veke.
– Omsetninga i kafeen og butikken i Ivar Aasen-tunet var svært god, og kostnadene har vore under kontroll, seier Ottar Grepstad, direktør for Nynorsk kultursentrum som arrangerer festspela, til Sunnmørsposten.
Endeleg rekneskap er først klart i september, så heilt sikker på overskot kan ein ikkje vere.
– Ein veit jo aldri, men eg vil bli svært overraska viss vi ikkje går i pluss. Vi har god økonomistyring, seier Grepstad.
– Kvalitet, kroner og nøgde gjester er ein slitesterk modell for ein festival som vår, meiner han.
