Eit aukande tal mac- og pc-brukarar vel å bruke programvara OpenOffice.org, og stadig fleire lastar ned nynorskversjonen.
Ifølgje tal frå digi.no har den norske versjonen av OpenOffice.org blitt lasta ned 573 000 gonger i 2009. Det er 72 000 fleire nedlastingar enn året før, og omlag 273 000 fleire enn i 2007.
Så langt i år er den norske versjonen lasta ned 200 000 gonger.
Tala er likevel ikkje heilt eintydige, seier Martin Hauge i Stiftelsen Åpne Kontorprogram til digi.no. Tala inkluderer mellom anna nedlastingar av oppdateringspakkar. Samstundes veit ein at mange bruker den engelske versjonen av Openoffice.org.
Også nynorskversjonen av programvara blir lasta ned stadig meir. I fjor utgjorde nynorskversjonen 7,8 prosent av samal nedlastingar, medan talet så langt i år er på 9,7 prosent.
OpenOffice.org er ei gratis kontorprogramvare med fri kjeldekode. OpenOffice.org verker mellom anna på Linux, Windows og Mac OS.
Foto: Flickr
