Øystein Furevik frå Førde i Sunnfjord som jobbar i gamer.no er årets vinnar av Kultur- og likestillingsdepartementets nynorskpris for journalistar.
Frå juryen heiter det at Furevik sidan har 2002 skrive vel 1.900 meldingar og artiklar for nettstaden gamer.no, der tekstane både er grundige, lettlesne og fulle av humor. I grunngjevinga blir det først og fremst trekt fram standhaftig bruk av nynorsk i ei verd der det meste føregår på engelsk.
– I over 20 år har Furevik drive journalistisk nybrotsarbeid på eit område der det er lite norsk og minimalt med nynorsk. Det at Furevik er godt synleg i det viktigaste norskspråklege organet for ein stor og viktig kulturarena, er umåteleg verdifullt for nynorsken, skriv juryen.
Overraska
Sjølv vart han svært overraska over pristildelinga.
– Det var dagens sjokk, eg skjønte det ikkje heilt først. Dette er ei anerkjenning eg blir heilt rørt av. Eg er kjempestolt. Det er verkeleg stort for meg, seier Furevik.
Prisvinnaren seier han har fått mange reaksjonar for bruken av språket sitt. Særleg i starten fekk han mykje hets frå lesarane for å bruke nynorsk i tekstane sine.
Fått mykje tyn
– Lesarane var langt meir opptekne av at sakene var på nynorsk enn kva som stod i dei. Det gjekk så langt at ein av dei starta ei avstemming på eit nettforum. Heldigvis gjekk resultatet i min favør med god margin. Men det er klart eg har fått mykje tyn, både på nettforum og på e-post.
Kulturdepartementets nynorskpris for journalistar er på 75.000 kroner og eit kunstverk. Føremålet med prisen er å fremje bruk av nynorsk i media, og årleg ære ein dyktig journalist som brukar ein levande og god nynorsk, og som er eit føredøme for andre. Tidlegare vinnarar er mellom anna Linda Eide, Arill Riise, Harald Thingnes og Ronny Brede Aase. (©NPK)
