Olav H. Hauge-senteret i Ulvik opnar vårsesongen 29. januar med soga om den såkalla Askerkretsen og held fram med feiring av St. Valentins-dagen i februar og poesidagen i mars.
På valentinsdagen – alle hjarters dag – den 14. februar feirar Hauge-senteret kjærleiken med dikt av Odveig Klyve. Klyve skal lese frå samlinga «Kjærleikens geometri», som har vore utgangspunktet for eit samarbeid med musikaren Eva Pfitzenmaier.
Poesidag
På den internasjonale poesidagen 21. mars skal diktaren Erlend O. Nødtvedt lese utvalde lyrikkperler og utdrag frå si eiga samling «Trollsuiten», mens vinkjennaren Ove Svendsen skal servere edle vinar. Musikk blir det òg, lover Hauge-senteret.
Alfred Fidjestøl skal 29. januar fortelje frå boka «Frå Asker til elden» om landsmålspionerane Hulda og Arne Garborg og Marta og Rasmus Steinsvik og den såkalla Askerkretsen. Fidjestøl fekk Sultprisen for forfattarskapen sin i fjor.
Soga om Seselja
Elles på vårprogrammet står framsyninga «Soga om Seselja» etter Ruth Lillegravens diktsamling Urd, som ho fekk Brageprisen for i 2013. Lillegraven har laga framsyning av dikta saman med musikarane Rannveig Djønne og Tuva Syvertsen.
I mai blir det familiekonsert med Annlaug Børsheim og Mari Skeie Ljones og siderslepp og konsert med det lokale prosjektet ReHarvest – songar frå Neil Young-albumet Harvest i norsk språkdrakt. (©NPK)
