Tysdag kjem kulturminister Thorhild Widvey (H) til Sogn og Fjordane for å lære meir om nynorskfylket i vest.
Fylkesordførar Åshild Kjelsnes (Ap) inviterte rett over nyttår den nye kulturministeren til Sogn og Fjordane og Førde, slik at rogalendingen kunne bli betre kjent med fjordfylket og korleis dei arbeider med språkpolitikken der. Og no kjem altså statsråden til Sunnfjord Hotel i Førde.
Saman med nynorskorganisasjonane i fylket har fylkeskommunen laga eit rikhaldig program med føredrag, kunstnariske innslag og debatt om utfordringane i den nynorske språkkvardagen. Blant innleiarane er Ottar Grepstad i Nynorsk kultursentrum, språkforskar Øystein Vangsnes ved Universitetet i Tromsø og Jan Olav Fretland, nestleiar i hovudutvalet for kultur i fylkeskommunen.
Om kvelden skal dessutan statssekretær Knut Olav Åmås (H) vere med på debatt om kulturpolitikken i kulturforumet Kultureliten på Pikantloftet i Førde. Dit kjem òg festivaldirektør Hilde Bjørkum i Førdefestivalen, kulturskribent Katrine Sele og kulturforskar Georg Arnestad. (©NPK)
