Snart er det duka for Nynorske Litteraturdagar i Aurland. I år kjem mellom andre Finn Tokvam, Tove Bakke og Arnfinn Nordbø.
Det er Aurland kommune som står bak litteraturfestivalen, som 30. oktober til 1. november går av stabelen for fjerde året på rad. I år får musikken ein større plass i programmet enn han har hatt før. Målet er å binde litteratur og musikk saman.
– Føremålet med litteraturdagane er ikkje først og fremst målsak, men å skape eit fokus på nynorsk identitet og språk. Det er også eit føremål å skape eit tiltak litt utanom den vanlege reiselivsesongen i Aurland, seier prosjektleiar Arve Tokvam.
Han legg vekt på at festivalen haustar god omtale og har etablert seg som ein litteraturfestival for eit bredt publikum.
– Me har ikkje noko tema for festivalen, slik som mange andre har. Dette skal vere eit lågterskeltilbod der det er noko for ein kvar smak, seier Tokvam og legg vekt på at ein her finn interessant program både for litteraturinteresserte, studentar og andre.
Nynorske Litteraturdagar i Aurland er også viktig for omdømmebygginga av kommunen.
– Det er ganske unikt at ein kommune står bak eit slikt prosjekt, meiner Arve Tokvam.
I år kan du høyre blant andre omsetjar Tove Bakke, forfattaren av boka ”Betre død enn homofil”, Arnfinn Nordbø, og humørspreiar Linda Eide. Her blir det også konsert med Olav Stedje, barne- og familiearrangement med Geirr Lystrup, teikneserieverkstad med Øystein Runde og Stand Up med Finn Tokvam.
