Austmannalaget var samla til fylkesårsmøte på Hundorp denne helga. Då fekk avisa Fjuken Målprisen 2013 frå Austmannalaget.
Fjuken har i 25 år hatt mykje å seie for nynorsken i Nord-Gudbrandsdalen.
– Historisk har nynorsken stått sterkt i Nord-Gudbrandsdalen. Men heller ikkje her er det rom for å kvile. Austmannalaget ser på Fjuken som ein av dei solide, viktige og urokkelege støttespelarane, og Austmannaprisen er ei påskjønning og ein takk for denne innsatsen. Frå ein trong start med base i Skjåk, har dei jobba seg opp til å bli ei viktig og svært populær lokalavis for heile Ottadalen, seier Even Lusæter, som delte ut prisen på vegne av Austmannalaget.
Austmannaprisen er ei påskjøning frå Austmannalaget til personar eller institusjonar som i tale eller skrift har gjort framifrå arbeid for nynorsk mål og norsk kulturarv.
– For oss er det ei stor ære å få målprisen. Fjuken er 25 år i år, og vi er trufaste mot nynorsken. Den sjølvtilliten har vi i Fjuken, smiler Asta Brimi, redaktør og dagleg leiar i Fjuken.
Austmannalaget er fylkeslag for Hedmark og Oppland i Noregs Mållag. Laget har siste åra hatt medlemsvekst og kan sjå tilbake på eit år med medlemsrekord. Laget fekk ein auke på 22 medlemer og har i dag 532 betalande medlemer. Det er høgste medlemstalet på 20 år.
– Det er mykje flott og spennande aktivitet i lokallaga våre, og det er svært inspirerande, seier Helen Johannessen, leiar i Austmannalaget.
Dei lokale laga som har hatt høgste medlemsauken er Hamar dialekt- og mållag, Hadeland dialekt- og mållag og Toten dialekt- og mållag. Medan det største lokallaget er Mållaget Ivar Kleiven i Vågå som har 100 medlemer og Fron Mållag med 87 medlemer. I Språkåret 2013 har lokallaga markert Ivar Aasen og nynorsken.
Nyvald styre ser slik ut: Leiar: Helen Johannessen, Hamar (attval). Styremedlemer: Kirsti Krekling, Lillehammer (attval), Olaf Nøkleby, Lena (ny), Solveig Elgevasslien, Folldal (ikkje på val) og Kari Elin Sperstad, Skjåk (ikkje på val). 1. varamedlem: Aksel Hagen, Lillehammer (ny) og 2. varamedlem: Kine Skåri, Nord-Fron (ny).
