Forfattaren Brynjulf Jung Tjønn vende tilbake til nynorsken med den prislønte boka «Så vakker du er». No har han fått pris frå Sogn og Fjordane Mållag.
Etter debutboka «Eg kom for å elske» gjekk forfattaren frå Feios i Vik i Sogn over til å skrive på bokmål, og det vart fire bøker før det stoppa litt opp. På råd frå ein konsulent prøvde Tjønn seg på nynorsk igjen, og då losna det.
– For oss i heimfylket vart han som den heimkomne sonen. Med denne målprisen ønskjer vi han velkomen heim, sa leiar Aud Lunde i Sogn og Fjordane Mållag då ho overrekte prisen, eit bilete av Oddvar Torsheim.
For romanen «Så vakker du er» har Tjønn også fått Brageprisen. (©NPK)
