Over 2200 bibliotek og skular over heile Norden les Maria Parr denne veka.
Det er klart for Nordisk bibliotekveke denne veka, og i år er temaet vennskap i Norden.
– Bibliotekveka skaper eit heilt spesielt fellesskap, når heile Norden og Baltikum samlast om å lesa den same litteraturen, seier Heidi Lønne Grønseth, skule- og bibliotekansvarleg i Foreningen Norden.
Nordisk bibliotekuke er eitt av verdas største høgtlesingsarrangement, og blir arrangert av Foreningen Norden.
Boka for yngre barn er Vaffelhjarte av Maria Parr. Boka er omsett til alle dei største nordiske språka og totalt 27 språk.
– Boka er ei morosam og rørande fortelling om Lena og Trille sitt sterke, men sårbare vennskap. Maria Parr tar temaet og barn på alvor, seier Heidi Lønne Grønseth til Framtida.no.
Les intervju med Marjun Syderbø Kjelsnæs: – For å forstå denne ståstaden som heiter Norden
Boka for ungdom er Skriv i sanden av Marjun Syderbø Kjelnæs. Frå synsvinkelen til ti ungdommar skildrar forfattaren korleis vennskap og gode relasjonar til andre er viktig. Og at menneske ikkje alltid er slik dei først ser ut til å vera.
Les bokmelding: Universelt om ungdom
Høgtlesingsboka for vaksne er eit utdrag frå Islendingesogene, som blir sett på som det viktigaste bidraget til verdslitteraturen frå Norden. Trass i nøkternt språk blir sterke kjensler skildra og syn på lojalitet og slekt- og vennskapsband på 900- og 1100-talet.
Les intervju med Maria Parr: – Alle barndommar er like viktige
