Eit forslag frå Helsedepartementet kan tvinge fram meir interkommunalt samarbeid om legevaktordninga, trur rådmann i Sogn.
Regjeringa vil nemleg stille strengare krav til norske legevakter, fortel NRK.no.
I dag treng legar ein autorisasjon for å arbeide ved legevakta. Vinn forslaget frå Helsedepartementet fram, kan det bli nødvendig mellom anna å vere spesialist i allmennmedisin eller ha tre års røynsle.
Om legevaktene ikkje oppfyller krava i forslaget, må ein ha ei bakvakt, noko som kostar for små kommunar. Rådmann Oddbjørn Ese i Vik i Sogn trur kommunesamarbeid må til for å fylle krava.
– Skal ein ha ei robust, trygg og fagleg god nok ordning så avheng ein av å spele på lag med ein større organisasjon. Då er ein nøydd ut og samarbeide med andre, seier han til NRK.no.
Også legevaktsjef Trond Inselseth ved Nordfjord legevakt trur fleire småkommunar kan måtte gå inn i interkommunale samarbeid. (©NPK)
