Heimesidene til kommunane er fulle av feil og ikkje til å stola på. Det viser ei undersøking Forbrukarrådet har gjort.
Undersøkinga viser at det er store manglar når det gjeld prisinformasjon på heimesidene til kommunane, fortel Aftenposten. Av dei ti prisane Forbrukarrådet leitte etter, fann testarane berre seks. Halvparten av desse var feil.
Undersøkinga omfattar dei hundre største kommunane og femti tilfeldig valde kommunar.
Det er sjette året på rad at Forbrukarrådet sjekkar kor gode kommunane er på service og informasjon.
– Situasjonen er blitt betre – alle kommunane har fått nettsider – men han er ikkje god nok når det gjeld informasjon. I tillegg til at mykje er feil, er mykje av informasjonen altfor vanskeleg å finne, seier leiar Randi Flesland i Forbrukarrådet til avisa.
Kommunalminister Liv Signe Navarsete meiner resultatet er for dårleg og seier ho vil ta saka opp med KS, interesseorganisasjonen til kommunane. (NPK)
