Bønder i Noreg produserer nok til å dekkje halvparten av matvareforbruket i landet, viser tal frå Norsk institutt for landbruksøkonomisk forsking (Nilf).
Sjølvforsyningsgraden av mat har dei siste åra auka takka vere effektivisering, fagkunnskap og betre avlingar.
Ifølgje Nilf var sjølvforsyninga av matvarer gjennom norsk landbruk i 2008 på 49 prosent. Talet tek ikkje omsyn til at deler av kjøttproduksjonen er delvis basert på importerte råvarer gjennom kraftfôr.
Deler av veksten kjem nemleg frå auka import av kornråvarer til kraftfôr. Samtidig blir det mindre jordbruksjord til å dyrke mat på, skriv Nationen.
Veksten i matproduksjonen bør i størst mogleg grad vere basert på lokale ressursar, meiner leiar Norges Bondelag Nils T. Bjørke.
– Vi er vane med at det er lett å få kjøpe mat i utlandet. Slik treng det ikkje vere til evig tid, og vi kan ikkje overlate jobben med å lage mat til andre. Mange menneske rundt om i verda har for lite mat i dag og matproduksjonen må aukast kraftig framover. Vi må ta vår del av ansvaret, og da må vi gjere det mogleg å ta vare på og utnytte jorda og ressursane vi har, seier han. (©NPK)
