Dette skuleåret har Språkrådet og Noregs forskingsråd lansert ein eigen språkpris for unge nysgjerrigperar.
Jurykriteria for den nye språkprisen er: «Nysgjerrigpers språkpris vert delt ut av Språkrådet. Prisen går til eit prosjekt der eit språkleg emne vert utforska. Emnet må ha tilknyting til norsk språk eller forholdet mellom norsk og andre språk. Vi brukar språket i all slags situasjonar, anten vi les, skriv eller snakkar. Namn på personar og stader, slang og dialektar, språk og teknologi er berre nokre døme på emne som kan utforskast. Utfordringa er å vise korleis ein skaffar kunnskap om språket og bruken av det.»Forskingsrådet har i fleire år delt ut prisar i forskjellige kategoriar til unge forskarspirer. Språkprisen blir delt ut i den årlege forskingskonkurransen for barn, Årets nysgjerrigper. Her forskar barna sjølve og dei konkurrerer om å skrive den beste forskingsrapporten. Dei ti beste prosjekta i landet får Nysgjerrigperpris og ein pengepremie. Kvart år deltar omkring 2000 elevar i Årets nysgjerrigper.
I fjorårets nysgjerrigper-tevling var det to språklege prosjekt som deltok. Ved Bruvik skule i Østerøy kommune i Hordaland var det 16 elevar som forska på kallenamn i bygda før og nå. Ved Tokke skule i Telemark forska sjetteklassingane på kvifor det var så mykje feil i det nye norskverket deira.
Leveringsfristen for forskingsrapporten til Årets nysgjerrigper er 1. mai 2012. På nettsidene til Språkrådet og Årets nysgjerrigper kan du lese meir om den nye språkprisen.
