Det Norske Samlaget har trekt seg ut av nettbokhandelen Bokdykk og Blåmann barnebokklubb. No tek lokale krefter over.
Dei lokale investorane Trond Økland og Michael Dorfman frå Florø skal drive selskapet vidare som ein nynorskprofilert kulturbokhandel på nett og barnebokklubb for nynorske bøker, heiter det i ei pressemelding frå Samlaget.
– Vi ser fram til å drive Bokdykk og Blåmann vidare som eit frittståande nettbasert selskap, seier Trond Økland.
Forlagsredaktør i Samlaget, Tove Lie, legg i pressemeldinga vekt på at Samlaget no er godt nøgde med at både nettbokhandelen og barnebokklubben vert drive vidare. No skal forlaget derimot konsentrere seg om å utvikle bøker og forlagsprodukt, seier ho.
Bokdykk AS blei oppretta i 2007 av Samlaget og Økland Invest. I 2008 blei barnebokklubben Blåmann også ein del av selskapet.
