Fredag var siste fristen for å førehandsstemme til kommunestyre- og fylkestingsvalet. Fram til onsdag var det registrert rundt 407.000 førehandsstemmer, noko som er ny rekord.
Ved kommunestyre- og fylkestingsvalet i 2007 vart det gitt rundt 374.000 førehandsstemmer.
– Det er svært gledeleg at så mange veljarar bruker stemmeretten sin. Dei mange førehandsstemmene gjer at eg håper vi får svært høg valdeltaking også på valdagen. Dette viser at innbyggjarane hegnar om lokaldemokratiet, seier kommunal- og regionalminister Liv Signe Navarsete (Sp).
Av dei 407.000 stemmesetlane som var registrert til og med onsdag, er rundt 21.300 komne gjennom prøveordninga med e-stemmer, som blir gitt som førehandsstemme over internett. Berre i Oslo er det registrert over 67.000 stemmer.
Førehandsstemminga blir avslutta fredag. Etter den tid må du troppe opp på valdagen 12. september for å få stemt i valet. I 195 kommunar er det også høve til å stemme søndag 11. september.
Har du først levert førehandsstemme, kan du ikkje angre og stemme på nytt på valdagen. Førehandsstemma er endeleg. (NPK)
