Til hausten blir det seks nye privatskular med 535 plassar i Hordaland.
Danielsen skoler skal blant anna etablere to nye skular, ein ungdomsskule i Lindås med 180 elevplassar og ein ungdomsskule på Osterøy med 90 plassar. Administrasjonssjef Bernhard Belt i Egill Danielsen Stiftelse legg vekt på at etableringane kjem etter ynskje frå foreldre.
Danielsen skole er ein kristen friskule i bergensområdet. Bak skulen står Indremisjonsforbundet og Norsk Luthersk Misjonssamband.
– Me set ikkje i gang skular på eige initiativ. I båe tilfella kjem etableringane etter oppfordring frå foreldra som ynskjer eit alternativ til den offentlege skulen i kristendomsfaget, seier Belt til Bergens Tidende.
Ordførar i Osterøy, Kari Foseid Aakre er derimot skeptisk til at det blir så tett mellom privatskulane. Tre privatskular vil etablere seg i Osterøy kommune frå neste år. Ho peikar på at det i dag er 1000 elevar i grunnskulen i Osterøy i dag, og meiner at dersom Utdanningsdirektoratet no vil godkjenne 200 nye skuleplassar i kommunen vil et bli ein del overetablering.
– Me ynskjer ein sterk offentleg skule og meiner at me må setje inn ressursar på å få det til, seier ho til Bergens Tidende.
