Nynorsk kultursentrum skal etablere og drive Olav H. Hauge-senteret i Ulvik. Det er klart etter at styra i Olav H. Hauge-stiftinga og Nynorsk kultursentrum samrøystes har godkjent ein avtale om samanslåing.
Nynorsk kultursentrum, med base i Ørsta på Sunnmøre, skal etablere senteret i Hardanger og har som mål å kunne opne senteret hausten 2012.
– Hauge-senteret skal få ein klar profil og drive like publikumsretta og sjølvstendig som Ivar Aasen-tunet har gjort i ti år, seier styreleiar Reidar Sandal i Nynorsk kultursentrum i ei pressemelding. – Ved sida av å leggje grunnlaget for Språkåret 2013 blir utvikling av Hauge-senteret den viktigaste oppgåva vår dei neste åra.
Nynorsk kultursentrum skal ha ansvaret for utvikling og drift av senteret. Hauge-stiftinga vil framleis ha ansvaret for det stiftinga eig og lokal eigarskap forblir den same.
