No etterlyser Nynorsk kultursentrum dei gode tiltaka som styrker journalistikk på nynorsk og som kan føre til fleire nynorskbrukande journalistar.
Vinjefondet skal i år dele ut omlag 800.000 kroner til nynorsktiltak i pressa og Nynorsk kultursentrum har fått i oppgåve å finne kven som skal få midlane.
– Vinjefondet skal gjere det lettare å vere nynorskbrukar, vere med og gjere nynorsk til eit sjølvsagt språk i alle typar media, og stimulere utgivarar og redaktørar til å engasjere og tilsetje fleire nynorskbrukarar i ulike media, seier administrasjonssjef i Nynorsk kultursentrum, Magni Hjertenes Flyum til Vikebladet.
Tiltak som kan vere av interesse er til dømes praktikantordningar, praksisplassar, språklege tiltak og etterutdanning.
– Det er viktig at tiltaka det blir søkt om midlar til er handlingsretta, at det når mange lesarar, lyttarar eller sjåarar, og det må gjerne vere eit medium eller ein sjanger der nynorsk i dag er lite brukt, seier Hjertenes Flyum, som også er leiar i fagrådet for Vinjefondet.
Med seg i fagrådet har ho Tomas Bruvik (Kvinnheringen), Aagot Opheim (Adresseavisa), Lars Arve Røssland (Universitetet i Bergen) og Sverre Liestøl (Høgskulen i Volda).
Søknadsfristen er 15. november.
