Museum som ikkje er med i større museumssenter får ikkje fast statleg stønad. Mange små lokalhistoriske museum slit derfor med å halde oppe drifta.
I 2000 blei den nasjonale museumsreforma vedteken, og den innebar at svært mange museum blei slått saman i større regionale einingar. I dag må ein vere med i ei slik eining for å få fast statleg stønad, skriv NRK.no.
Strilamuseet er eitt av musea som slit på grunn av dette. Museet har berre kapasitet til å halde ope tre timar kvar søndag og alt arbeid skjer på dugnad gjennom Lindås Sogelag.
I samarbeid med Lindås kommune skal museet no derfor prøve å bli med i Museumssenteret i Hordaland. Om samarbeidet fungerer kan prosjektet i Nordhordland bli eit nasjonalt føredøme.
– Me skal finne ei god løysing saman med sogelaget og museumssenteret. Me må ta vare på eldsjelene og finne ein driftsmodell der det offentlege hjelper med tilrettelegging, slik at dei kan få gjere det dei har mest lyst til, seier kultursjef Øyvind Stang i Lindås kommune til NRK.no. (©NPK)
