– Flyktningar og arbeidsinnvandrarar som kjem til ein nynorskkommune, kan i dag risikere å få berre bokmålsopplæring når dei skal lære seg norsk. Noregs Mållag meiner at vaksne innvandrarar i nynorskområde må få lære seg nynorsk, skriv leiar i Noregs Mållag, Marit Aakre Tennø.
– Språk er ein nøkkel til vellukka integrering. I kommunar der nynorsk er skule- og administrasjonsmål burde det vere innlysande at opplæring i nynorsk er eit godt tilbod til innvandrarar. Med kunnskapar i nynorsk er det lettare for dei å hjelpe borna med leksene, forstå informasjon frå kommunen, lese lokalavisa og elles finne seg til rette i miljøet. Nynorsk gjer også innvandrarar betre i stand til å forstå og bruke den lokale dialekten, og betre i stand til å forstå dei mange ulike dialektane i Noreg, skriv ho i Stavanger Aftenblad.
– Dagens regelverk seier ikkje noko om kva for språk elevar ved opplæringssentra skal lære. Viss ikkje kommunen har gjort eit vedtak om administrasjonsspråk, står opplæringssenteret fritt til å velje nynorsk eller bokmål. Kva språk dei vaksne innvandrarane i kommunen skal lære, bør følgje administrasjonsmålet i kommunen.
