Haugesund folkebibliotek sette nyleg nynorsk på dagsorden. I tillegg til å skipe til eigen nynorskfest har dei laga eit hefte der dei tilrår gode nynorskbøker.
Folkebiblioteket er ein av institusjonane som tidlegare fekk støtte frå Fritt Ord til å starte litteraturprosjekt som skulle stimulere til auka formidling av nynorsk litteratur. Navnet på prosjektet vart Les! Nynorsk! og vart delt inn i to deler; eit hefte med tilrådingar om nynorske bøker og ei festveke med litteraturarrangement. Haugesund folkebibliotek vart støtta med 50 000 kroner frå Fritt Ord.
Les også: Fritt Ord støttar nynorske litteraturprosjekt
– Nynorskfesten vart eit veldig vellukka prosjekt, me hadde mange arrangement som vart godt besøkt, seier biblioteksjef Torill Borge Homeland som legg vekt på at det er kjekt å ha eit nynorskarrangement også i ein bokmålskommune.
Ideen om eit hefte der ein kunne tipse om dei gode nynorskbøkene kom til etter spørsmål frå bibliotekarane sjølve. I tillegg til støtta frå Fritt Ord fekk også biblioteket støtte frå Haugesund Mållag og Ungdomslag til å gi heftet eit godt design.
– Fleire sakna hjelp til å formidle nynorskbøkene. Mange kjem innom biblioteket og skal ha ei «god nynorskbok», då er det ikkje alltid like enkelt å kome på kva ein har inne i farten, seier Homeland.
– Vaksenavdelinga til barne-og ungdomsavdelinga har samarbeidd og plukka ut bøker for ungdom og vaksne. Me har konsentrert oss om nyare utgjevingar og har gjort eit utval på grunnlag av bokomtalar, blogginnlegg og eigne lesaropplevingar, står det i sluttrapporten som er laga.
Heftet er no lagt ut på nett, og allereie er det kome inn 40 spørsmål frå heile landet om å få det tilsendt. Heftet er trykt opp i 700 eksemplar. Det er også laga ei utstilling midt i biblioteket med dei tilrådde bøkene.
– Bibliotekarane skal vere gode på så mange felt, då er det godt med slike hjelpemidler.
På nynorskfesten kunne ein mellom andre møte Are Kalvø, Gaute Sortland, Solveig Aareskjold, Agnes Ravatn, Siri Kvamme og Bergen Mandolinband.
