Siv Jensen meiner kampen for valfritt sidemål er den viktigaste språksaka framover.
– Kva blir den viktigaste språksaka fram mot Stortingsvalet 2013?
– Kampen for valfritt sidemål. Eg er også oppteken av språkkunnskapar for å sikre god kommunikasjon mellom tilsette og brukarar i helsetenestene. I ei fersk kartlegging frå NRK og Fagforbundet svarer 46,5 prosent at dei har opplevd kritikkverdige episodar som følgje av at dei tilsette snakkar for dårleg norsk.
– Kva blir den viktigaste nynorsksaka ?
– Å få lik moms på e-bøker og trykte bøker meiner eg er svært viktig for å styrke litteraturen, anten han er på bokmål eller nynorsk.
– De vil privatisere NRK og dermed fjerne nynorskkravet, kvifor?
– Me er mot lisensfinansiering av NRK. NRK, som alle andre medium, må sjølv få velje kva målform dei vil publisere sakene sine på.
– De vil innføre valfritt sidemål, kvifor?
– Nynorsk og bokmål er så likt at dersom du beherskar nynorsk, forstår du bokmål, og omvendt. Me meiner difor det er viktigare for skulen å prioritere at elevane får best mogleg kompetanse i éi målform, framfor å tvinge dei til å lære to.
– Kva tenkjer du om mållova?
– Eg meiner det er langt meir effektivt om sakshandsamaren kan svare på skriftlege spørsmål på den målforma vedkomande sjølv ynskjer. Mållova bidreg til høgare administrasjonsutgifter og langt meir papirarbeid i offentleg sektor.
– Kva trur du blir den viktigaste utfordringa for nynorskkommunane framover?
– Eg meiner kommunen si viktigaste oppgåve, uansett om dei er nynorskkommunar eller bokmålskommunar, er å gje innbyggarane gode tenester. Å levere høg kvalitet innan eldreomsorg, barnehage og skule er kommunen si fremste oppgåve.
– Korleis påverkar språksakene eit eventuelt regjeringssamarbeid etter valet?
– Som alle andre politiske spørsmål er desse også noko som skal diskuterast før eit eventuelt regjeringssamarbeid. Eg er glad for at Høgre har fylgt etter FrP i spørsmålet om obligatorisk sidemål.
