Regjeringa set ned eit utval som skal vurdere dei økonomiske støtteordningane på medieområdet.
Dei økonomiske verkemidla overfor pressa, pressestøtta og momsfritaket, vart utforma på slutten av 60-talet og har vore vidareført fram til i dag utan vesentlege endringar.
No ønskjer regjeringa å gå gjennom verkemidla. Grunnen skal vere store strukturelle endringar i dagens mediekvardag, der internett og sosiale medium spelar ei stadig meir sentral rolle.
«Med henvisning til de omfattende endringene innenfor teknologi, mediebruk og medieøkonomi må utvalget foreta en helhetlig vurdering av bruk av tilskuddsordninger og andre økonomiske virkemidler på medieområdet», står det å lese i ei pressemelding frå Kulturdepartementet.
Utvalet skal leiast av Yngve Slettholm og skal til saman ha elleve medlemmer. Arbeidet skal ende i ei innstilling til Kultur- og kyrkjedepartementet innan 1. januar 2011. (©NPK)
