Kommunestyret i Valle kommune i Setesdal har vedtatt at også dei vaksne innvandrarane skal få nynorsk opplæring.
– Eg vil få gratulere Valle kommune med at dei er neste kommune i rekkja som går inn for å gi vaksne innvandrarar opplæring i nynorsk. Det vil styrkje integreringa deira i lokalmiljøet og gi dei gode kunnskapar i norsk – også om dei seinare skulle flytte til andre stader i landet, seier Magne Aasbrenn, leiar i Noregs Mållag i ei pressemelding.
– Med nynorsk i opplæringa vil valldølane med utanlandsk bakgrunn få eit ekstra godt grunnlag for skule og arbeid i Noreg.
Ordføraren: – Naturleg
Ordførar Steinar Kyrvestad (Ap) seier til LNK.no at som ein nynorskkommune, er det òg naturleg at dei har nynorsk som opplæringsmål for dei vaksne innvandrarane.
– I høve til folketalet har me tatt i mot mange flyktningar. Me har kring 48 flyktningar til ei kvar tid, fortel han. Kring 80 flyktningar har no budd meir enn fem år i kommunen, fortel han.
Ordføraren håpar no nynorskopplæringa kjem i gang så rakst som det er praktisk mogleg.
43. kommune
I strategiplanvedtaket til Valle kommune står det: «Målforma i opplæringa i norsk/samfunnsfag i introduksjonsprogrammet skal vere nynorsk. Når barn og foreldre har lik målform, vil foreldre lettare kunne bli involvert i barna sin skulekvardag. Likeins vil det å lære nynorsk kunne vere eit pre i høve flyktningane som må byrje eit nytt utdanningsløp i Noreg, både grunnskuleopplæring for vaksne – og seinare vidaregåande skule. Nynorsk er obligatorisk både i grunnskulen og på vidaregåande skule. »
Valle er den 43. kommunen som har gjort vedtak om eller har gått over til nynorskopplæring for vaksne innvandrarar. Valle kommune er fyrst ute med å gå over til nynorsk på Agder.
