Statsminister Jens Stoltenberg (Ap) seier det er uaktuelt å tvinge kommunar til å slå seg saman, men avviser ikkje nye tonar framfor valet i 2013.
– Det går ein debatt i Arbeidarpartiet om dette fram til valet i 2013. Eg meiner det er viktig å ha eit ope blikk på kommunestrukturen, men vil åtvare mot å tru at samanslåing er svaret på alle spørsmål, seier Stoltenberg.
Jan Tore Sanner frå Høgre hevda i spørjetimen onsdag at samhandlingsreforma er i ferd med å renne ut i sanden fordi regjeringa ikkje vil gripe inn og slå saman små kommunar. Han viste til det koordinerte utspelet frå helsedirektør Bjørn-Inge Larsen og direktør Petter Skarheim i Utdanningsdirektoratet, som meiner korkje skuletilbodet eller utdanningstilbodet er godt nok i dei minste kommunane.
– Eg står trygt planta på Soria Moria-erklæringa som legg opp til fri vilje ved kommunesamanslåingar, akkurat slik den førre regjeringa gjorde, svara Stoltenberg. (NPK)
