Senterpartiet vil auka støtta til profesjonelle og semiprofesjonelle kulturmiljø utanfor sentrale strøk ved å flytta midlar frå Kulturrådet til fylkeskommunane, skriv Nationen.
Ifølgje Sp kulturpolitisk talsperson, Olov Grøtting, er målet er å desentralisera kulturlivet for å styrka kulturskular, fritidsklubbar og folkebibliotek i lokalsamfunn. For å få dette til vil forslaget innebera ei omfordeling av dagens kulturmidlar. Grøtting meiner forslaget vil styrka samarbeidet mellom profesjonelle og amatørar i kulturlivet.
I dag er dei statlege kulturmidlane ifølgje Grøtting urettferdig fordelt og viser til at mykje av dei regionale kulturmidlane sidan 2010 har landa i regionale sentrum mellom Stavanger og Trondheim. Så trass i at alle norske fylke har opplevd auke i kulturmidlar dei siste tre åra, er skilnadane framleis store.
Ingen god idé
Kulturpolitisk talsmann for Høgre, Olemic Thommesen, synest forslaget er ein dårlig idé og seier til Nationen at det vil innebera ei pulverisering av kulturmidlar, då midlane som i dag vert fordelt til mange kulturområde allereie er begrensa. Skal midlane fordelast på 19 fylke er det ikkje mykje kulturmidlar att å fordela.
Statssekretær Kjersti Stenseng (Ap) i Kulturdepartementet er heller ikkje samd i at ei desentralisering av kulturmidlar til fylka vil føra til ei meir rettferdig spreiing av kulturmidlar.
