Norske kommunar sikrar personvernet dårleg, viser ei ny undersøking.
Ifølgje Nationen innrømmer kvar femte kommune alvorlege brot på tryggleiken, men få søkjer hjelp for å sikre personvernet.
Ei undersøking frå Norsk senter for informasjonstryggleik og kommunal Informasjonssikkerhet viser at mange kommunar ikkje sikrar sensitive opplysningar godt nok.
Berre litt over halvparten av kommunane har klare rutinar for å handtere sensitive opplysningar. Og trass i at kommunane kan få gratis hjelp til å kartleggja informasjonstryggleiken, er det få som nyttar seg av dette tilbodet.
Det mest vanlege brotet på tryggleiken er åtferda til dei tilsette. Publisering av saksdokument på internett, minnebrikker på avvege og attgløymde utskrifter, er døme på brot på personvernet.
Datatilsynet og KS meiner ifølgje avisa at det ikkje står så dårleg til, men arbeider for å betre rutinane. (NPK)
