Den prisvinnande felespelaren Sigrid Moldestad kjem til Dei nynorske festspela i juni.
Moldestad er ein av dei mest etterspurde folkemusikarane i landet i dag, og ho kjem til festspela med sitt faste band beståande av Sigbjørn Apeland på harmonium, Jørgen Sandvik på gitar, banjo og mandolin, Anders Hall på feler, Anders Bitustøyl på kontrabass.
Den tidlegare Spelemannspris-vinnaren vart i 2010 kåra til Årets folkemusikar for 2010, ho vann Folkelarmprisen 2010 for plata Sandkorn og fekk også heimkommunen Gloppen sin målpris. På tampen av året blei ho tildelt fylkeskulturprisen for Sogn og Fjordane og Lutt-prisen frå NRK Sogn og Fjordane.
Det endelege programmet for Dei nynorske festspela blir ikkje lagt ut før i april, men det er allereie klart at forfattaren Bjørn Sortland frå Bømlo i Sunnhordland blir festspeldiktar. Sortland blir den attande festspeldiktaren, og han har gitt ut om lag 40 bøker, dei fleste for barn og unge, men han skriv også bøker for vaksne.
Dei nynorske festspela 2011 blir arrangerte i Ørsta og Volda frå torsdag 23. til søndag 26. juni, med Ivar Aasen-tunet som hovudarena.
