Prosjektet Målstreken har laga ein video kor ungdom fortel om sitt forhold til nynorsk. Målet med prosjektet er å finne ut kvifor så mange ungdommar sluttar å bruke nynorsk.
– Det handlar om staheit og stoltheit, om stoltheit av opphavet mitt, seier 25 år gamle Eirik Høyme Rogn, festivalsjef i Vinjerock og prosjektarbeidar i Norsk Rockforbund når han skal fortelje kva han tenkjer om språket sitt.
Vinjerock har alltid brukt nynorsk og dialekt som sitt varemerke, og Høyme Rogn seier han har jobba aktivt for å få andre næringsdrivande i Valdres til å gjere det same. – Mange bedrifter i Valdres har byrja å bruke nynorsk etter at eg har vore innom dei, seier han og håper dei har halde fram med det sjølv om han ikkje er på pletten heile tida og passar på.
Målstreken er eit treårig prosjekt i regi av Valdres Mållag og Noregs Mållag, og prosjektet starta i 2009. Videoen til Målstreken, kor fleire ungdommar seier sitt om språket deira, kan du finne her.
