Den norske barne- og ungdomsfilmen Keeper’n til Liverpool håvar inn priser. No har filmen fått publikumsprisen under filmfestivalen Cinequest i California.
Keeper’n til Liverpool kom ut i 2010 og er basert på forfattaren Lars Mæhle si bok Keeperen til Tunisia (Samlaget 2002). Tidlegare i vinter fekk filmen den prestisjetunge Krystallbjørnen som beste film under den internasjonale filmfestivalen i Berlin. Filmen utkonkurrerte òg 11 andre barnefilmar og gjekk til topps i Montreal internasjonale barnefilmfestival.
Filmen skal vidare til barnefilmfestivalen i Ghent, Belgia (Flanders) og skal vere åpningsfilm på barnefilmfestivalen i Malmø (BUFF) som går av stabelen denne veka. I tillegg er det meir enn 30 land som har meldt si interesse for filmen, melder nettstaden til Norsk Filminstitutt.
Keeper’n til Liverpool handlar om 13 år gamle Jo Isdstad som skyr både fotball og jenter og alt som kan vere farleg. Heilt til Mari kjem inn i klassen og i livet hans. Les meir om filmen på Filmweb.
