Kunnskapsdepartementet ønskjer i den nye lærarlova å lovfeste eit forholdstal mellom lærar og elevar. Men kommunane ønskjer ikkje ei slik lov, melder NRK i dag.
Ei slik lovfesta regulering av kor mange elevar ein maks kan ha per lærar kan føre til at ein del skuleklassar blir mindre enn i dag, og at ein treng monaleg fleire lærarar enn i dag for å få reknestykket til å gå opp.
Utdanningsforbundet er svært nøgde med forslaget, men KS er ikkje like begeistra. Områdedirektør Helge Eide i KS seier til NRK i dag at ein ikkje har noko bevis på at større lærartettleik gir betre læringsresultat. Han undrar seg over at Regjeringa vel å gå for ein slik pakke i staden for å sjå på kva som kan best kan auke kvaliteten i skulen. Også ordførarar NRK har snakka med peikar på at den nye lærarlova kan bli ei dyr løysing, og dei meiner det må vere opp til kvar kommune og skule å styre dette.
