Firebarnsmor, varaordførar og mjølkebonde Elisabeth Holand (31) frå Vestvågøy i Nordland blei i går kåra til Årets unge bonde.
– Eg hadde aldri trudd eg skulle vinne, seier Elisabeth Holand til Nationen.
Vinnaren var tydeleg både overraska og rørt då namnet hennar blei ropt opp under tildelingsarrangementet på Studentersamfunnet i Ås. Ho nytta takketalen til å takke familien.
– Foreldra mine har oppdratt meg med eit syn på landbruket som noko positivt, det har vore utruleg viktig, sa ho.
Det er Norges Bygdeungdomslag (NBU), McDonald’s og Nationen som står bak kåringa. Juryen har mellom andre bestått av landbruksminister Lars Peder Brekk (Sp), sjefredaktør Mari Velsand i Nationen, leiar Inger Johanne Sveen i NBU, administrerande direktør Olli Kilpi i McDonald’s Norge AS og rektor Hans Fredrik Hoen ved Universitetet for Miljø- og Biovitenskap.
Her er grunngjevinga til juryen:
«Vinneren av Årets unge bonde 2011 er et sunt forbilde med et bredt engasjement for landbruk og det hun driver med. Som del av en ny generasjon bønder, kombinerer hun et spennende yrkesvalg med et aktivt familieliv og betydelig samfunnsengasjement.
Vinneren har et glødende engasjement for landbruket og tar selv grep for å tilegne seg nødvendig kunnskap for å drifte på best mulig måte.
Hun har også vist at hun takler utfordringer på en forbilledlig måte.
Vinneren av Årets unge bonde 2011 har flere tillitsverv i landbrukets organisasjoner, og er også svært aktiv i lokalpolitikken. I tillegg til dette har hun fire barn som alle har debutert enten på rådgiversamling i Tine eller årsmøte i Nordland Bondelag.»
– Det var utruleg hyggeleg å vinne, det er flott å vise at også unge kvinner kan vere gode bønder, seier Holand. Ho sier vidare at det framleis er mange som tenker at bonde er ein mannsjobb, og håpar denne prisen kan vere viktig for næringa, for å vise at ein bonde ikkje nødvendigvis er ein gamal, traust mann.
Rundt 200 forslag på kandidatar har kome inn til Årets unge bonde 2011. Kriteria er at kandidaten må vere under 35 år, matprodusent og eit bra førebilete. Elisabeth Holand var finalist saman med ni andre unge bønder.
