Kari Stai og Lars Amund Vaage vann kvar sin pris under Bragepris-utdelinga onsdag kveld, melder NRK.
Kari Stai fekk Brageprisen i klassen for barne- og ungdomsbøker for boka Jakob og Neikob. Tjuven slår tilbake (Samlaget 2012). Dette er den andre boka om dei to vennene som har som sitt særpreg at den eine berre kan svare ja og den andre berre kan svare nei.
Lars Amund Vaage fekk prisen for beste roman i klassen for skjønnlitteratur. Romanen Syngja handlar om å leve med ei dotter med autisme, og boka kom ut på Oktober forlag i haust.
Linn T. Sunne fekk prisen i klassen for ungdomsbøker med boka Lille ekorn, medan Torbjørn Færøvik drog heim prisen i klassen for sakprosa med Maos Rike. En lidelseshistorie.
Knut Faldbakken fekk dessutan Brageprisens heiderspris. Juryen peiker på at forfattarskapen til Faldbakken er ein av dei lengste og mest omfagsrike i norsk samtidslitteratur, og at forfattaren har greidd å vere både aktuell og kontroversiell gjennom heile forfattarskapen.
Brageprisen blir delt ut av stiftinga Den norske Bokprisen. Prisen har blitt delt ut årleg sidan 1992 og føremålet er å heidre gode norske forfattarskap, og å skape interesse for norsk litteratur.
Meir om utdelinga av Brageprisen kan du lese her og her.
