Dagleg leiar i LNK, Vidar Høviskeland, meiner det er viktig for organisasjonen å samarbeide godt med alle partia på Stortinget.
– Valresultatet var vel om lag som venta. Men det var spennande å følgja med valnatta. Som vanleg under val bestemte eg meg for å leggja meg tidleg og som vanleg vakna eg i TV-stolen i grålysninga, seier Høviskeland.
– Kor viktig trur du nynorsken var i valkampen?
– For mange veljarar trur eg dette med sidemålsproblematikk var viktig, Særleg Venstre trekte nok til seg ein del potensielle Høgreveljarar i den saka.
Alt i alt trur eg ikkje språksak hadde så mykje å seia for utfallet av valet denne gongen, fordi dei som skifta parti av språkgrunnar stort sett gjorde dette innafor si eiga politiske «blokk».
Høviskeland legg vekt på at LNK har vist at dei kan samarbeide godt med alle parti, men det for landet sin del truleg er best med ein breiast mogleg koalisjon.
– Og kva med rolla til opposisjonen?
– Rolla til opposisjonen er alltid viktig. Opposisjonen skal vera kritiske vaktbikkjer og moderatorar og såleis gjera dei som er i posisjon endå betre.
