Edvard Hoem fekk tysdag Språkprisen 2013 for framifrå nynorsk, medan Gyrid Gunnes fekk prisen for framifrå bokmål. Juryen rosar vinnarane for presist, klart og stilsikkert språk.
Språkprisen blei delt ut av Språkrådet for framifrå bruk av norsk språk i sakprosa. Vinnarane fekk 50.000 kroner, eit trykk av Kjell Nupen og eit diplom kvar.
– Vinnarane handlar i strid med konvensjonell språkleg praksis, skriv juryen.
Edvard Hoem vann nynorskprisen for biografien om Bjørnstjerne Bjørnson.
– Blant biografar i samtida står vinnaren av nynorskprisen i ei klasse for seg. Han skriv lett og ledig, men aldri likegyldig. Han greier å framstille ei kompleks og nokså turbulent historie med stort kjeldetilfang i eit klårt og presist nynorsk språk. Med dei fire banda i biografien om Bjørnstjerne Bjørnson har han løfta heile den nyare norske historia inn i moderne nynorsk språkdrakt, skriv juryen.
Hoem sjølv var ikkje førebudd på at han kunne vinne prisen.
– Dette var uventa. Eg har aldri tenkt at eg kunne vinne denne prisen, for eg har aldri tenkt på meg sjølv som sakprosaist, sa Hoem under utdelinga.
Bokmålsprisen gjekk i år til Gyrid Gunnes for boka «Stemmer. Å forkynne Guds ord klart og urent. Utkast til en feministisk prekenpraksis» (2013) og for kronikkar publiserte i Dagbladet og Morgenbladet. (©NPK)
