Universiteta og høgskulane på Vestlandet vurderer å gå saman i eit felles føretak etter modell av helseføretaka.
På Høyden skriv at Universitet i Bergen arbeider med eit notat om kven dei kan tenkje seg å slå seg saman med på oppdrag frå Kunnskapsdepartementet (KD) som ønskjer færre institusjonar innanfor høgare utdanning. Ifølgje rektor Per Hasle ved Høgskulen i Volda vil dei gå inn for ein føretaksmodell med avgrensa samarbeid og inga direkte samanslåing.
Modellen byggjer på UH-nett Vest, som er eit samarbeid mellom Universitetet i Bergen, Universitetet i Stavanger, Høgskolen i Bergen, Høgskulen i Sogn og Fjordane, Høgskulen i Volda og Høgskolen Stord/Haugesund.
– Om vår modell er god nok for KD, eller om departementet berre forventar reine fusjonsplanar, veit vi enno ikkje, seier Hasle til På høyden.
Direktørane ved Universitetet i Bergen og Stavanger seier til nettavisa at føretaksmodellen er ei av fleire moglege løysingar. (©NPK)
LES OGSÅ: Fryktar sentralisering
