Tronge klasserom blir stadig vanlegare for elevar i grunnskulen. Etter at kravet om at det ikkje er lov med meir enn 28 elevar i kvar klasse vart fjerna for ti år sidan, har klassane est ut.
I 2001 gjekk 14 prosent av elevane i ein klasse med 20 elevar eller meir, medan no går 23 prosent i slike store klassar, opplyser Utdanningsdirektoratet til Aftenposten.
I 2004 var det ingen som hamna i klasserom med over 25 elevar. I opplæringslova heiter det no at klassane «ikkje må vere større enn at det er pedagogisk forsvarleg eller trygt».
– Kommunane kan no styre dette sjølv, og det blir berre større og større grupper. I Oslo veit vi at skulebudsjetta blir dårlegare år for år. Og sidan det er lærarlønna som kostar, kutter ein der, fortel hovudtillitsvalt Hilde Bentsen i Utdanningsforbundet Oslo.
Ei talfesta grense for klassestorleik har vore utgreidd og foreslått fleire gonger dei siste åra. I haust skal Stortinget behandle eit KrF-forslag om at alle 1.- 4.-klassar må ha to lærarar dersom elevtalet er over 16. (©NPK)
