Haugen Gardsmat er tildelt Innovasjon Norge sin Bygdeutviklingspris 2014 i Sogn og Fjordane.
Med base på garden i Flåm og god marknadsinnsikt, har dei utvikla ei lønsam foredlingsbedrift som gjev arbeid og inntekt både til eigarar og tilsette. Kjerneverksemda er kjøttforedling med basis i råvarer av sau og lam frå Aurland, tamrein, svin og hjort. Bedrifta er eigd og blir drive av Odd Lothe Ohnstad og Kristine Grønner Ohnstad som eig kvar sin halvpart og med Odd som dagleg leiar. Bedrifta vart etablert som enkeltmannsføretak med eigne produksjonslokale i 2002, men omorganisert til aksjeselskap i 2006. Produksjonen vart utvida gjennom leige av nye lokale i 2009.
– Eit tett samarbeid med primærprodusentar gjev tilgang til råvarer av høg kvalitet og kjent opphav/identitet. Dette gjer dei i stand til å levere kjøttvarer med ei historie om kvalitet og dyrevelferd, som blir formidla gjennom matopplevinga til sluttbrukaren både med omsyn til produktet, beiteområde, bonden og tamreinlag, heiter det i ei pressemeldig frå Sogn og Fjordane fylkeskommune.
Bedrifta har spesielt lukkast i kundesegmenta hotell- og restaurant og har mange privatkundar på marknader i fleire større byar.
Dei har mellom anna vore med på å starta opp butikken Sesong i Kjøttbasaren i Bergen, med lokalmat som hovudfokus. No er dei inne i Bondens Butikk i Mathallen i Oslo.
Haugen Gardsmat har konkrete planer om å vidareutvikle bedrifta. Dette omfattar utvikling i produksjonen og arbeidet med å utvikle kundegrunnlaget. Eit spennande delprosjekt blir å utvikle samarbeidet reiselivsbedrifter både i og utanfor fylket og daglegvarehandelen.
Avgjerda i juryen var samrøystes. Prisen er på 50.000 kroner og blei utdelt av juryleiar og styreleiar i Innovasjon Norge Sogn og Fjordane Jenny Følling under opninga av Fylkestinget i Loen, tysdag 14. oktober. Som prisvinnar i Sogn og Fjordane går Haugen Gardsmat as vidare som kandidat til Innovasjon Norge sin nasjonale BU-pris, der det vert plukka ut ein vinnar som får 250.000 kroner.
