Er nynorsk eit godt språk for fagtekstar? Det er spørsmålet Pernille Fiskerstrand stiller under Ivar Aasen-minneforedraget på Dei nynorske festspela 26. juni.
Fiskerstrand er stipendiat ved Nynorsksenteret og studerer fagtekstar i samfunnsfag skrivne av yrkeselevar med nynorsk som hovudmål. Sidan det knapt finst fagkjelder på nynorsk, møter desse elevane andre utfordringar enn bokmålselevane.
LES OGSÅ: – Språket er det viktigaste verktøyet
Ho meiner at mange ser på det som eit hinder at ein ikkje har tekstar med faguttrykk på eige mål, men meiner sjølv at det ikkje treng å vera det.
– Når ein jobbar med kjelder på eit anna språk, må ein tenkja over språket i tillegg til innhaldet i det ein skriv, og det er vist at ein då kan læra innhaldet betre. Bokmålselevar treng ikkje arbeida språkleg, dei kan berre reprodusera dei same termane dei les i kjeldene, seier Fiskerstrand.
Fiskerstrand held føredrag fredag 26. juni på Aasen-tunet som del av Dei nynorske festspela. (©NPK)
