Programkomiteen til Høgre vil fastslå at det er Stortinget, ikkje lokalsamfunna, som bestemmer om kommunar skal slåast saman.
Per i dag har ikkje partiet noko om kven som til slutt bestemmer om kommunereform i programmet sitt, men i forslaget til nytt partiprogram blir punktet om kommunesamanslåing skjerpa, skriv Dagens Næringsliv.
Programkomiteen vil legge fram at «Høgre meiner Stortinget har eit overordna ansvar for å sikre at Noreg har ein hensiktsmessig forvaltningsstruktur og i siste instans må avgjere størrelse, og talet på kommunar og regionar».
Leiar i programkomiteen til Høgre Torbjørn Røe Isaksen seier at reforma må fortsette, og at den ikkje er ferdig med 50 færre kommunar.
– Om nødvendig må Stortinget gjere vedtak om å slå saman kommunar, seier han til avisa.
Arbeidarpartiets Helga Pedersen hevdar Høgre med dette erkjenner at dei ikkje har oppnådd dei resultata som regjeringa ønskte.
– No verkar det klart at Høgre vil innføre tvang for å oppnå alle dei kommunesamanslåingane partiet eigentleg ønskjer seg. Dette står i sterk kontrast til kva Stortinget og kva fagstatsråden sjølv har sagt, nemleg at kommunereforma skal baserast på fri vilje, seier ho. (©NTB) (©NPK)
